ardanlendeelitkufaruessvtr

عادل السرحان

مو بس خذاني الشوگ يمكم بالحلم

وشْبَعِتْ من دمع العيون الطايحه

شفت الأحبهم وشبگتهم ونحبت

أفيش ياريحة عشگهم فايحه

واثاري آنه ماني عايش بالصدگ

العيشة راحت وي سنيني الرايحه

البارحة رديت للديرة گبل

بين البيوت الطين روحي سارحه

وشميت ريحة گاع من دگها المطر

وشبگت نخلة  بشوگ فزّت صايحه

ومن الصبخ روحي روت كل العطش

من شافت بروس النخل عنوانكم

لا ماتضّيع روحي منگوشه نگش

وسط الگلب مثل الحرف رسماتكم

ولو ضيعت وسط الخراب المنتچي

تدلّيني صرخة شوگ من گيعانكم

آنه أدري روحي الجتكم بممشى الحلم

مشتهيه تبقى تضوي كل عتماتكم

ويالونكم لون السنابل لو علت

ولون البياض القدّح بشجراتكم

ولون الربيع الخضّر بكتر الغرف

ولون الورود الفاحت  بوجناتكم

الله ياطعم الجنوب الماشبع

من طعمه من ضاگ وعرف ملحاتكم

عنبر يفوح بگاع شتله من الصبح

وجوري يطگ لو لامستّه شفافكم

قيم الموضوع
(0 أصوات)
عادل السرحان

شاعر عراقي