ardanlendeelitkufaruessvtr

الحلو ما بيتشبعش منه

بقلم ليمي سعيد تموز/يوليو 17, 2020 180

ليمي سعيد

بيبقي نفسنا نقعد قعدة حلوة مع ناس حلوة بيحبونا وبنحبهم ونفرح جدأ لو ده حصل. بنلاقي نفسنا مش عايزينها تخلص ونفضل ساعه بنسلم ونقف علي الباب نكمل و بنقدم رجل ونأخر رجل إننا نمشي. و لو كان متاح اننا نفضل يوم و أتنين وثلاثه وعشرة. برضه بنمشي واحنا زعلانيين وبنحس أن الأسبوع  مر وكأنه ساعة.

الأكلة اللي بتحبها بتبقي مش عايزها تخلص .الهدوم اللي بتحبها و علي ذوقك بيبقي هاين عليك تخرج بيها كل يوم .و بتلبس اكتر حاجه بتحبها  كتير.الأغنية اللى بتحبها بتحب تشغلها كتير و بتحسن حالتك النفسية.  

لمة المصيف مع الحبايب و الهوا الساقع علي البحر و السهرات اللي كلها ضحك وهزار مهما قعدناها بنبقي عايزينها تانى. مبنشبعش منها وبمجرد رجوعنا بنبقي عايزين نرجعها تانى و تالت و عاشر ده مش طمع ده حب للحياة لأن ده بيكون أحلى أوقات حياتنا . و اللي بيحرمنا منها بنكرهه. لأن ده اللي بيصبرنا علي شقا الدنيا وتعبهاو صعوبة الحياة . 

كتر من اوقاتك الحلوة حتى لو ما بيتشبعش منها .

إوعى تكون انت سبب تعكير اى قعدة حلوة لأنك هتبقي مكروه لانك بتخرب احلي لحظات السعاده اللي ياعالم هترجع امتى ومين هيكون ناقص منها وليه. ولادك و مراتك وأهلك  ليهم حق عليك انك تشبعهم من كل حاجه حلوة و تكون انت الحاجه الحلوة في حياتهم.مش من منغصات حياتهم.

كل واحد فينا خليه هو الحاجه الحلوة اللي ما يتشبعش منها .

حاول ما تحرمش حبايبك من الحاجه اللي بيحبوها علشان يوم ما تمشي من الدنيا يفتكروك بكل حاجه حلوة وتكون ذكرى حلوة. أدينا شايفين الناس بتروح فثانية  لا في سبب ولا كتالوج .ومهما حاولت تبعد حد عن ناس بيحبها أو حاجه بيحبها انت الخسران لأنهم هيكونوا معاها بقلوبهم وعقلهم وخيالهم وإحساسهم وانت بس الجاحد اللي معاك جسم بلا اى روح خلي بالك الوقت الحلو والروح الحلوة واللقمه الحلوة و الناس الحلوة و المزاج الحلو لا محتاج فلوس ولا مجهود و لا تعب ولا بغلو الشئ أو المكان ولا الأكله ولا بجمال الناس فقط لأن الروح الحلوة اهم بكتير. قوموا اقعدوا مع حد روحه حلوة و انتم كمان خلي روحكم حلوة و افتحوا مانجه علشان انا بحبها و اتفرجوا علي مسرحية ريا وسكينه اهي بعد سنيين بتضحك .إعملوا كل حاجه بتحبوها وبتفرحكم وعيشوها صح أصلها بتتعاش مرة واحده اللي بتحبوه ده بينور وشكم وبيزود طاقتكم و بيصبركم علي اى شدة و بيهون اى تعب و بيديكم طاقة إيجابية حلوة. اقولكم فكرة حلوة كل حاجه حلوة فحياتكم  وكل حد بتحبوه إستودعوهم الله الذي لا تضييع ودائعة  فستعودون لها حتما يومأ ما فهذا وعد الله  .الاشياء المستودعة عند الله لا تضييع ابدأ أحبائى جميعأ (إن الذي فرض عليك القرآن لرادك الي ميعاد أستودعكم الله الذي لا تضييع ودائعة )

قيم الموضوع
(0 أصوات)