ابراهيم المحجوب
شلج بالوطن عوفيه للبواگ
تدرين الوطن لامالي لامالچ
الوطن للساكن الخضراء خيتاه
ماهو لعمچ وخالچ
الوطن مايسوا القواطي يبنت الخير
ميفيد الوطن عد شيلة حمالچ
على ياوطن خل نحچي اني وياچ
فاضح شيبتچ ومجوع إعيالچ
تنبشين المزابل والنفايات
وانت الخير كلو إنوجد بسلالچ
ياأمنا العفيفة المايهزها الريح
كراسيهم القذرة فدوة لنعالچ
واذا وكتچ نزل وإصعدت هيچ اشكال
هنيالچ يحسنة والف هنيالچ
ويبقى ابن الحثالى بوي مال أجناب
وتظل ريحة عطر والهيل بدلالچ
العراق اصبح يالحبيبة دكاكين
تقاسم بالحصص وامريكا حي فالچ
والنفط اصبح بشرع الوكت فرهود
وترى دين السياسي مخالف اقوالچ
لاتشكين همچ منهو اليشكيچ
اذا لزگو ارهاب بطارف ذيالچ
واذا اختلفو الساسة هناك بالخضراء
ثاني يوم عبوة تكتل اطفالچ
مسكينة ام القواطي تشيل هم العيش
ودعايات الكتل اتعيش امثالچ
لاتبنين آمال بچذب فرعون
ولتصدكين كلمن ينكر افضالچ
ولتغرچ عمامة وسبحة الحجاج
ترى كلها تمثل كاعدة كبالچ
يا ام القواطي الگصص معد تفوخ
ومو كلمن لبسلو عگال يبرالچ
ولاكلمن قسم بالوطن والدستور
يا ام الحراير ضاعت رجالچ
حرامي الباگنا مايعرف العيب
بيدينوا الشفيه صنع چتالچ
ياوسفه الزمان اشلون بيچ ندار
چنتي انتي الكريمه وخير بستانچ
ادفنوا كلشي عزيز بطيبة الگاع
وصعدوا بالهمر واسحگوا آمالچ
